កំពង់ធំ៖ អគ្គស្នងការដ្ឋាននគរបាលជាតិ នាយឧត្តមសេនីយ៍ ស ថេត បានចេញសេចក្តីសម្រេចនៅថ្ងៃទី១១ ខែកញ្ញា ឆ្នាំ២០២៣ ដកហូតមុខតំណែង អនុសេនីយ៍ឯក ហុង សារ៉ុម ពីនាយប៉ុស្តិ៍នគរបាលរដ្ឋបាលសំព្រោជ នៃអធិការដ្ឋាននគរបាលស្រុកស្ទោង ចំណុះស្នងការដ្ឋាននគរបាលខេត្តកំពង់ធំឱ្យមកជាមន្ត្រី។

ការសម្រេចដកហូតតំណែងនេះ ដោយសារតែបុគ្គលរូបនោះកន្លងមកមានជាប់ពាក់ព័ន្ធនឹងបទឧក្រិដ្ឋប្លន់ទូមាសទាំងកណ្តាលថ្ងៃនៅក្នុងផ្សារស្ទោង កាលពីថ្ងៃទី០៨ ខែមីនា ឆ្នាំ២០១៥ ចំនួនជាង ១៥០តម្លឹង ជាមួយនឹងជនសង្ស័យម្នាក់ទៀត។

ការដកហូតតំណែងនេះធ្វើឡើងក្រោយពីនាយរកដ្ឋមន្ត្រីកម្ពុជា សម្តេចមហាបវរធិបតី ហ៊ុន ម៉ាណែត បានស្នើឱ្យមានការត្រួតពិនិត្យស្រាវជ្រាវលើបុគ្គលរូបនោះដែលធ្លាប់ជាប់ពន្ធនាគារពាក់ព័ន្ធនឹងបទឧក្រិដ្ឋ។

នាយករដ្ឋមន្ត្រីបានបញ្ជាដូច្នេះថា៖«ខ្ញុំសូមឱ្យមានការត្រួតពិនិត្យ និងវាយតម្លៃឱ្យបានច្បាស់លាស់នូវបុគ្គលិកលក្ខណៈរបស់បុគ្គលនីមួយៗឱ្យបានហ្មត់ចត់មុននឹងធ្វើការតែងតាំង នៅតាមបណ្តាស្ថាប័នរដ្ឋទាំងស៊ីវិល និងកងកម្លាំងប្រដាប់អាវុធ ទាំងថ្នាក់ជាតិ និងក្រោមជាតិ»៕